مشترکہ مفادات کونسل کا اجلاس،بھارتی ایڈونچرکےتناظر میں یکجہتی کا پیغام جاری –

ویب ڈیسک: وزیراعظم شہباز شریف کی زیرصدارت مشترکہ مفادات کونسل کے اجلاس میں بھارتی ایڈونچر کے تناظر میں یکجہتی کا پیغام جاری کردیاگیا ۔
جاری اعلامیے کے مطابق وزیراعظم کی زیرصدارت مشترکہ مفادات کونسل کا52 واں اجلاس ہوا۔کونسل نے پہلگام حملے کے بعد بھارتی یکطرفہ غیرقانونی اور غیر ذمہ دارانہ اقدامات کی بھرپور مذمت کی۔ کونسل نے ممکنہ بھارتی جارحیت اور مس ایڈونچر کے تناظر میں ملک و قوم کے لیے اتحاد اور یکجہتی کا پیغام دیا۔
مشترکہ مفادات کونسل کا کہنا ہے کہ پاکستان پرامن اور ذمہ دار ملک ہے، ہم اپنا دفاع کرنا جانتے ہیں۔
اعلامیے کے مطابق تمام صوبائی وزرائے اعلیٰ نے بھارتی اقدامات کیخلاف وفاقی حکومت کے شانہ بشانہ کھڑا رہنے کا عزم کیا۔
اعلامیے میں کہا گیا کہ مشترکہ مفادات کونسل کی باہمی منظوری کے بغیرکوئی نیا نہری منصوبہ شروع نہیں کیا جائیگا، تمام صوبوں کے درمیان مفاہمت کے بغیر وفاقی حکومت اس سلسلے میں مزید پیشرفت نہیں کریگی۔
اعلامیے کے مطابق وفاقی حکومت صوبائی حکومتوں سے مل کر زرعی پالیسی کا روڈ میپ تیارکر رہی ہے، حکومت ملک میں آبی وسائل کے انتظامی ڈھانچے کی ترقی کیلئے طویل المدتی متفقہ روڈمیپ تیار کر رہی ہے۔
تمام صوبوں کے پانی کے حقوق1991کے پانی کی تقسیم کے معاہدے میں محفوظ ہیں، یہ حقوق2018کی پانی پالیسی میں فریقین کی رضامندی کے ساتھ محفوظ کیے گئے ہیں۔
اعلامیے میں کہا گیا کہ صوبوں کے تحفظات دورکرنے اور غذائی وماحولیاتی سلامتی کویقینی بنانے کیلئے کمیٹی تشکیل دی جارہی ہے، کمیٹی میں وفاق اور تمام صوبوں کی نمائندگی ہوگی، کمیٹی طویل المدتی زرعی اور صوبوں کی آبی ضروریات کے حل تجویز کرے گی، تجویز کیے گئے حل دونوں متفقہ دستاویزات کے مطابق ہوں گے، نئی نہروں کی تعمیرکیلیے7فروری 2024 کوایکنک کی منظوری کو واپس لیا جائے گا، 17جنوری 2024 کیاجلاس میں اس سے متعلق ارساکا سرٹیفکیٹ واپس لیاجائیگا۔
اعلامیے میں کہا گیا کہ پانی ایک قیمتی اثاثہ ہے، آئین سازوں نیلازمی قرار دیا ہیکہ پانی سے متعلق تنازعات افہام وتفہیم سے حل کیے جائیں،کسی بھی صوبیکے تحفظات کو تمام متعلقہ فریقوں کی مشاورت سے دورکیا جائیگا۔
سندھ طاس معاہدے کی معطلی اور پانی روکنے کی صورت میں پاکستان اپنےآبی مفادات کے تحفظ کا حق رکھتا ہے۔
خیال رہے کہ یہ اجلاس 2مئی کو ہونا تھا لیکن حکومت سندھ کی گزارش پر وزیراعظم نے آج اجلاس طلب کیا۔
اجلاس کے بعد میڈیا سے گفتگو میں وزیراعلی خیبر پختونخوا علی امین گنڈاپور نے بتایا کہ سندھ کے عوام کے لیے خوشخبری ہے ارسا سے خط واپس لے لیا گیا ہے، تمام صوبوں کو پانی کے حقوق دیے جانے کے حق کے عزم کا اعادہ کیا گیا ہے، دریائے سندھ پر نہریں بنانے کا فیصلہ واپس لے لیا گیا ہے۔