10لاکھ بچوں کو سکول داخل کرانا ہدف، صوبہ بھرمیں داخلہ مہم بھرپوراندازسےجاری ہے

ویب ڈیسک: وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ 10لاکھ بچوں کو سکول داخل کرانا ہدف، بانی پی ٹی آئی عمران خان کے وژن کے مطابق صوبہ بھر میں داخلہ مہم بھرپور انداز سے جاری ہے۔
انہوں نے کہا کہ وزیر اعلیٰ خیبرپختونخوا سردار علی امین گنڈاپور نے داخلہ مہم کو مؤثر بنانے کے لیے تمام دستیاب وسائل بروئے کار لانے کی ہدایت کی ہے اور وہ خود اس مہم کی نگرانی کر رہے ہیں۔
صوبائی مشیر نے کہا کہ وزیر اعلیٰ نے محکمہ تعلیم کو مزید ہدایت کی ہے کہ کوئی بھی بچہ سکول سے باہر نہ رہے، 10لاکھ بچوں کو سکول داخل کرانا ہدف مقرر کیا گیا ہے، داخلہ مہم کو مؤثر بنانے کے لیے اساتذہ، والدین، مقامی مشران اور بااثر افراد کی خدمات حاصل کی جا رہی ہیں،منتخب نمائندوں، نوجوان رضاکاروں اور علمائے کرام کو بھی داخلہ مہم کا حصہ بنایا جا رہا ہے۔
ان کا کہنا ہے کہ خیبر پختونخوا حکومت نے داخلہ مہم کو مؤثر بنانے کے لیے سکول بیگز اور سٹیشنری مفت فراہم کرنے کا فیصلہ کیا ہے، بہت جلد تعلیم کارڈ کے منصوبے کا آغاز بھی کیا جائے گا۔
مشیر اطلاعات بیرسٹر ڈاکٹر سیف نے والدین سے اپیل کی ہے کہ وہ بچوں کو سکول داخل کروا کر اپنا قومی فریضہ ادا کریں، کیوں کہ آج کے بچے کل کا مستقبل ہیں اور اپنے مستقبل کو روشن وتابناک بنائیں۔
بیرسٹر ڈاکٹرسیف نے کہا کہ صوبے میں تعلیم کا فروغ موجودہ حکومت کی اولین ترجیح ہے، کیونکہ تعلیم کے بغیر ترقی ناممکن ہے، داخلہ مہم کو کامیاب بنانے کے لئے والدین پر بھاری ذمہ داریاں عائد ہوتی ہیں، امید ہے کہ والدین اپنی ذمہ داریوں کو نبھاکر اپنے بچوں کو تعلیم کے زیور سے آراستہ کریں گے۔
مشیر اطلاعات و تعلقات عامہ نے کہا کہ بچے ہمارا آنے والا مستقبل ہیں، اس لئے خیبر پختونخوا حکومت تعلیم کے فروغ پر خصوصی توجہ دے رہی ہے۔